မိုက်ကယ်ဂျက်ဆင်ရဲ့ လက်ရေးမူ တစ်စောင်မှာ ”ကျွန်တော် ကမ္ဘာကြီးကို ပြောင်းလဲ နိုင်ခဲ့ပါပြီ”လို့ အဲ့ဒိစာထဲမှာ ရေးထား

မိုက်ကယ်ဂျက်ဆင်ရဲ့ အထိမ်းအမှတ် ပစ္စည်းတွေက တဖြည်းဖြည်းနဲ့ လေလံပွဲတွေဆီကို ရောက်လာပြီး အထိမ်းအမှတ် ပစ္စည်းတွေကို သိမ်းဆည်းထားလိုတဲ့ သူတွေက ဝယ်ယူ စုဆောင်းနေရာ သူ့ရဲ့ လက်ရေးမူ တစ်စောင်မှာ အင်္ဂလန်က နာမည်ကြီး ဘီးတဲလ် အဖွဲ့ နဲ့ အမေရိကန်က ရော့ခ်ဂီတ ဘုရင်ကြီး အဲလ်ဗစ် ပရက်စလေ တို့ကို လူမျိုးရေး ခွဲခြားမှု အသားအရောင် ခွဲခြားမှုတွေ ရှိခဲ့တယ်လို့ အပြစ်တင် ပြောဆိုထားတာကို တွေ့ခဲ့ရပါတယ်။

ဒါအပြင် သူက အနောက်ကမ္ဘာရဲ့ ဂီတလောကမှာ အသားအရောင် ခွဲခြားမှုတွေ အများကြီး ရှိနေတယ်။ အဲ့ဒါကြောင့် အဲ့ဒိလူမျိုးရေး ခွဲခြားမှုတွေကို ပြောင်းလဲ ပစ်နိုင်ဖို့အတွက် သူ ကြိုးစားခဲ့ရတယ်လို့ ရေးသားခဲ့ ပါတယ်။

၁၉၈၇ ခုနှစ်လောက်က ရေးသားခဲ့ပုံရတဲ့ အဲ့ဒိစာထဲမှာ သူက လူမျိုးရေး ခွဲခြားမှုကြောင့် မတရားမှုတွေ ဖြစ်ပေါ်နေ ခဲ့တယ်လို့ ဆိုတဲ့အပြင် ဂီတ စီးပွားရေး လောကထဲမှာ အခြေအနေတွေ တော်တော် ဆိုးတယ်လို့ ပေါ့ပ် ဘုရင်ကြီးက သူ့ရဲ့ စာထဲမှာ ရေးခဲ့ပါတယ်။

မိုက်ကယ်ဂျက်ဆင်ရဲ့ သြဇာက သေဆုံးပြီးလို့ ၁၀ နှစ်ကျော် သွားသည်အထိ တိုင်အောင် ပုံရိပ်ကျဆင်းသွားခြင်း မရှိသေးပါဘူး။ အမေရိကန် ဂီတလောကမျိုးမှာတောင် အသားအရောင် ရှိတဲ့သူတွေရဲ့ ဂီတကို လူမဲထုတ်လုပ်သူတွေက လွဲလို့ ဘယ်သူမှ စွန့်စားပြီး ထုတ်ပေးလေ့ မရှိဘူးလို့လည်း စွတ်စွဲ ပြောဆို ခဲ့ပါတယ်။

သူက နာမည်ကြီး လူဖြူ အဆိုတော်တွေကို ကျော်တက်နိုင်ဖို့အတွက် ကြိုးစားခဲ့ပြီး နာမည်တစ်လုံး ရေးထိုး နိုင်အောင် လုပ်ခဲ့ရပါတယ်။ သူရဲ့စာထဲမှာ “အဲ့လ်ဗစ်ပရက်စလေဆိုတာ ဂီတမှာ ဘုရင်တစ်ပါး မဟုတ်ပါဘူး။ လူဖြူတွေက အလွန်အကျူး တင်စား ပြောဆိုနေတာပါ။

အဲ့လိုပဲ ဘီးတဲလ်တွေက မကောင်းဘူး မဟုတ်ပါဘူး ။ သူတို့တွေ တော်ကြပေမဲ့ လူမဲတွေထက် ပိုပြီး ကောင်းအောင် မဆိုတတ်ပါဘူး။ မကတတ်ပါဘူး။ ပေါ့ပ်ဂီတနဲ့ ကမ္ဘာကို လွှမ်းမိုးဖို့ ကြိုးစားရမယ်။ လူမဲ ပေါ့ပ်ဘုရင်တစ်ယောက်ရဲ့ အချိန်ကို ရောက်ပြီ ” လို့ ရေးခဲ့ပါတယ်။

မိုက်ကယ်က အမေရိကန်မှာ ရှိတဲ့ လူဖြူလူမဲ ခွဲခြားတဲ့ အစွန်းရောက် လူမိုက်ဂိုဏ်းတစ်ခု ဖြစ်တဲ့ ကေ ၃လုံး ဂိုဏ်းနဲ့ ပတ်သက်ပြီးတော့ အသားအရောင်ကြောင့် ကလေးတွေရဲ့အနာဂတ် ထိခိုက်ရမှာကို မိဘတွေ စိုးရိမ် နေကြရပါတယ်လို့လည်း ရေးခဲ့ပါတယ်။

၁၉၈၂ မှာ သူ့ရဲ့ THRILLER အယ်လ်ဘမ်က အချပ်ရေ သန်း ၂၀၀ ကျော် ရောင်းရခဲ့ပြီး နောက်မှာတော့ သူက လူမဲတွေရဲ့ ဂီတက ကမ္ဘာကို လွှမ်းမိုးနိုင်ပြီလို့ ယူဆခဲ့ပုံ ရပါတယ်။ သူက ကျွန်တော် ကမ္ဘာကြီးကို ပြောင်းလဲ နိုင်ခဲ့ပါပြီလို့ အဲ့ဒိစာထဲမှာ ဆိုခဲ့ပါတယ်။

မောင်ယဿ, REF: morror, Photo; getty image